IBIBIO VERSION: Akwa Ibom Governor-elect, Pastor Umo Eno’s victory speech

IBIBIO VERSION

THE VICTORY SPEECH BY PASTOR UMO ENO, GOVERNOR – ELECT, AKWA IBOM STATE, MARCH 19th, 2023 – UYO

1. Mbon Akwa Ibom Nnyịn

2. Nda mi ke nsuhọidem, ado nnie uko atoho akwuọk-udịm ibededem me mbọdidem ke ukeme andufo ekịtte ke idem mmi ebo yak ami nnam utom nte adad usʌñ ke isua inaañ adihe k’iso. Ndufo ekewọt ami ñkpọñ ke mme itie ufiik-ubọk. Akedo ke emem, unyịmme mme nnam-ñwọt afịd nnyịn.

3. Ndufo emaewuọ edi, edifiik ubọk ete yak emem mme ukpeme uwem-awo mme inyene abaha ke isua itiaita aboiyokedo akaiso aba; enyʌñ emaana ebo yak ukem ndadusʌñ Christ, nsuhọidem ke ukaada, mfọn, ukeme, eti-edu mme uforo akaiso aba ke afịd itie. Ndufo ekenam ami nam ato do ntək ayịn nnyịn mme mbon s’idiimanake dion ediikob inem ufọn ñwaana-ñkada-ukada enyʌñ edʌñọ ke inemesịd, ima mme edidiana keed.

4. Edikan ami, ami nyaak nnọ Abasi ke ntak mfọn anye annọhọ mien mme adudu adisʌk-nkaiso ke afịd mfịna s’ikiba; amaana annọ mien emem adikaiso ñwuuk anyen nse sekenaa ate nnam. Ekọọm asʌk anie “Kpasʌk Anye Abasi Ado”

5. Yak ami nnekke ñkọọm ete mmi ke mbre ukada, adad usʌñ ke ñka ubre ukada nnyịn Governor nnyịn, Ete Udom Emmanuel ke anye adikikịt ñkpọ se mbon mfen imikikanna ikịt ke idem mmi. Bọ ekọọm Mfọn-mma Ete, ada-ukada ke adida mme ami, ke adidad mme atu-ekọñ usʌñ ke ñkaiso eti ukada; ke adisọññọ nda mbo ke se Abasi aketʌññọ ke Akwa Ibom ana akaiso nna umiañ inem mbʌk akaiso aba.

6. Nkọọm Mfọn-mma Eka, Dr. (Mrs) Martha Udom Emmanuel, Adaiso ke atu Ibaan nnyịn, Ọbọọñ asuan-etob; ke mme umiañ ini anye akebiatta, mme nti ikọ ke usuan etob amọ, anamma nnọ inie akwuọk-udịm edikan anyịn ikiniehe ñkpọñ.

7. Mfọn-mma Ete, ami meñwọññọ unọ fien mme mbon nnyịn ekenịmme se afo adaakịt ke akpanikọ ke ami ndiyakka nnọ idodenyen mfo akpa mfʌhọ ke utom Abasi ayakka andod mien ke afada. Daña ndufo enyʌñ enam, ami nko ndi mme ata mbeññe idem adimʌm isọñ nnam utom ayọhọ-ayọhọ tʌññọ ke akpa usen.

8. Yak ami ñkọọm mbon ufọk mmi, añwaan ima mmi, Pastor (Mma) Patience Umo Eno, mfọọn nditọ mmi mme ebe mme ibaan nditọ mmi, nditọ eka mmi mme nditọ-nditọ mmi, mme mbon ekpǝk nnyịn ke adikiinnọ mien nsọñọnda ibededem mme akam ke idaha eketaaña me nsu-nsu ikọ ubiat awo anyịñ embaña mien. Ami mediọññọ daña akefịna awo ke akikere ke me ini ado, ado afid ado aboiyo afeb, ami nnyʌññọ nsịn awo ke esịd.

9. Yak ñkọọm ufọkabasi mme me Ete adadusʌñ ke mbọdidem ke akam ndufo mme ñkpeubọk ke iwuod mmi. Ami ndo keed ke atu ndufo, menyʌñ ñwọññọ adikaiso ke adinam ukada nnọ aba nte ukada Christ ami eti udọñ adịhi ikan idiọk ñkpọ; nti edu mme nti akikere adido sekama mbọb ukada.

10. Ama-ado akammba ñka mbre ukada nnyịn (PDP), Atie-iwuod Akpokodo, Elder Aniekan Akpan mme afịd ikpọ mbon utom kọmiti, ñkpon-ñkan adad-usʌñ usuan etob itọk mbre ukada, H.E. Ambassador Assam Assam (SAN) mme afịd mbon mboho usuan-etob itọk mbre ukada mme afịd mme adad usʌñ, emedod ekọọm ke nsọñọnda annyịn ikiniehe tutu nnyịn inie edikan ke umek awo.

11. Ñkpadawa mme uboikpa Akwa Ibom State, isọsọñọ ke adinam nnọ emem aba mme adinyʌñ ntʌm mʌm akikere ini iso afịd awo ñkama nte inie ndufo na nnyịn idʌñ ke emem. Daña ndufo ekeñwọññọ adimʌm emem ñkama eyʌñ etre afai akenam nnyịn inie ata sʌñsʌñ umek awo ñkpọñ. Ibọ ekọọm do.

12. Yak ñkọọm mbon ekemiaha nduba mbre ukada mme ami ke adikiñwana eti añwan. Ke nduba mbre ukada, ana andikan aba; ndion anem Abasi esịd adinam nnọ ami ndo andikan. Ami mmenyan mfañ (Olive) emem mme ubọk nsaña utom nnọ afịd nditọ eka ekemiaha nduba mbre ukada mme ami mbo edi nnọ ibọb Akwa Ibom State ami inem ikwuọ emem, uforo, ima mme adidiana keed nte nditọ eka adịhi ikaiso isọñ uyio inyʌñ ibọb nnyịn idian keed ikan daña akedo.

13. Nte Akwọdọikọ, ami iniehe idiọk esịd mbaña awo nyʌññọ nsịn awo ke esịd. Ami mbo daña Abraham Lincoln akebo ate “nniehe idiọkesịd mbaña awo ndomokeed, nnie mfọn nnọ afịd awo”. Mmeñwọññọ mbo ke ukada ami ndịhi-ikama adido ukada afịd awo ami idimiaha awo ndomo keed ufen ke ntak awo adinie isio-isio akikre ukaada.

14. Nnyịn ido nditọ Akwa Ibom ke akpa ifed mbemiso anyịñ ñka mbre ukada. Ñka mbre ukada ado ñkpọ siben awo ika ukaada, ikemeke adidad itie adidiana keed nditọ eka anyịn iwanake keed tʌññọ ke esed.

15. Imidiọñọ mfọn-mfọn ibo ke mbre ukada ado ñkpọ akemeke adisịn ubakka, asuan ke mme ikpehe ke idʌñ. Ami mmeñwọññọ adisio kọmiti unam-emem adịhi kood nditọ eka ibaan mme ideen idian keed inyʌñ ise mme ñkpọ se idiinam nnọ idiana keed ikan se idiisuan nnyịn.

16. Nnyịn imikop inem emem mme ukpeme, uforo ke afịd itie ke isua itiaita aboiyoke do. Governor Udom Emmanuel ainọ nnyịn mme akan-afịd nti ñkpọ-uñwam ke idʌñ, itie ndubehe, nti itie usọbọ idem, itie udia uwem, ukaisañ ke afịm ke Ibom Air dian ke umiañ nti adinam mfen. Nnyịn iyaisịn ukeme nnyịn ke adinam nnọ mme awo edakka eda, ke adinam utomiñwañ afọnakan akpa, ñko mme awo etịde adiwuọñọ ke esịd idʌñ ñka ikpọ abio mme usʌñ inyene mfen ke daña iwet ke uduak nnyịn akedeke “A.R. I. S. E. agenda”.

17. Akwa Ibom asʌk-adakka ada, adisʌk ikaaka iso! Daña nnyịn idian ubọk ke uyio keed aditʌññọ isañ ami ke ñkọd mme uforo nte sted (State), ami maana ñkpeiye afịd nnyịn mbo yak eyaak usua, ubiad-anyịñ, ido udʌd awo ntịmme edem mme mfịna mfen, nna ato do nnyịn ikan ibọb Akwa Ibom annyịn iniehe ke akikere nnyịn.

18. Isọsọñọ ke akammba ufañ unam utom andufo ennọhọ mien ebo nnam, Yak Abasi adiọñ Akwa Ibom State, anyʌñ aidiọñ nnyịn akpaimọ.

Translator – Ini Mbebeng.