By INI MBBENG
Akwa Ibom Isọñọ!
Akwa Ibom Isọñọ!
Akwa Ibom Isọñọ!
Udua ami ado udua ami idara akponno eti-eti ke Akwa Ibom ke ntak adoho nditọ Akwa Ibom ita; ideen iba mme awoñwaan keed enam ñkpọ ewuọ eda ekan afịd mbon mfen ke nduba.
Inemesịd akpon eti-eti kodo ukpono ami awo iba ke atu awo ita ami ado ukpono etohoke añwa edʌk edi idʌñ Nigeria ke ntak nsịnifịk adinam eti ñkpọ mmaana nsịnifịk ndakka nda ñfehe nduba ami kọfnọ Udom Emmanuel akeboho yak nditọ Akwa Ibom enam.
Keed ke atu awo iba ami akenamma ñkpọ aben ukpono asọk Nigeria afịd-afịd ado ayịn awoñwaan isua 27 ke anye adikidada ke ukod afịd usen inaañ nteem umiañ nsio-nsio ndidia nnọ-ọ atu awo ediaha ke mfọn. Anye akenam ami adinam ñkan awoñwaan India aketemme ndidia ke ukem usʌñ ami ke awa 87 mme mminịk 45 ke isua 2019. Anye ayịn Akwa Ibom aketʌñọ akemọ akịd Thursday udua ako ke usen 11 ke afiọñ ition ami. Anye aketeem ndidia ami akon-m’uweeme tutu Monday usen 15 ke ñkanika itiaita ndubi; akedʌkkọ usen inaañ mme awa inaañ ami akedoho awa 100 amaana adod mminịk 40. Ekese yak nnọ anye aduọk adudu mminịk ition kpọd kwa awa keed. Anye akere Bilda Bassey Effiong. Ato Nsit Ubium. Adinam ami anam nnọ esịn anyịñ amọ ke ñwed afịd mbon s’isiinam ñkpọ ikañ ke ededimbod ekotto “Guinness World Record”.
Ayọhọ awo iba akere Anyanya Udongwo. Anye ado abia ibọk mbakada (doctor) ke abio mfia awo ke idʌñ Lithuania. Mbʌk ate ke anye ado akpa abubịd awo akanna ke nduba ukwọ ikwọ ke adinam nduba ikwọ ayọhọ 10 ke idʌñ ado. Ete ke nduba ado aseado ata akammba ñkpọ ke idʌñ abio mbakada ndion ke akpa mmewo idem daña Anyanya akekan anyʌñ abọ akʌk awakka asịm 5000 Euro ( adʌkkọ ke akʌk Nigeria mudion 4,6000,000.00).
Ayọhọ awo ita, George Iniabasi Essien akekan ke nduba ami mbon eboho afịd itie utañ ikọ nnyʌñ nsio ndise nsuan mbʌk ke afịm nnọ aseadʌk akebe utañikọ mme akebe ndise mme awo ke ufọk ekotto amọ Broadcast Organization Of Nigeria (BON). Ata akpa eketʌmmọ nduba ami akedom ke Lagos. George anam utom ke Comfort 95.1 FM ke Uyo. Anye akekan nte mfọn-ñkan-afịd awo atañikọ nnọ awo inemesịd mme mbʌk ke akebe utañikọ (Radio Presenter Of The Year).
Inemesịd akpon eti-eti ke Akwa Ibom daña afịd awo ita eben ukpono esọk idʌñ Akwa Ibom ndion awo iba eben esọk idʌñ Nigeria ke ikwọ mme utem ndidia nnọ akpeene akan ke afịd ededimbod.
Afịd adikan ami nditọ Akwa Ibom ekanna mi ato ntak ami kọfnọ Udom Emmanuel akeboho yak nditọ Akwa Ibom edakka eda ke imọ ke idem imọ imidakka ida.
Kase ñkpaafre; ke afañ mbre football anyịn iseikood mbre ikpa, ikpiidoho Akwa Ibom akeme adido eboho CAF ekpebo yak nduba ekpebreke mi ke idʌñ Nigeeia yak eben ekebre ke idʌñ mfen. Ntak ado ke amabe-e itie añwa mbre Uyo – Godswill Akpabio International Stadium, itie añwa mbre mfen ibaha aba ke afịd Nigeria se ifọn ikem nnọ CAF enyịmme se nduba ubre mbre ikpa adad itie. Añwa mbre ke Abuja ifọnọ, adaake Lagos ifọnọ; adaabaha ke Akwa Ibom kpọd afọn. Ke-ntodo mbon CAF ete ke afịd-afịd nduba ke isua ami mme isua mfen anaha ebre ke Nigeria kedibre ke Uyo kpọd.
Yak mbon Akwa Ibom ekọọm kọfnọ Udom Emmanuel ke anye adikit mbo ke etʌm añwa mbre ado ekamma nnọ asana, afịd ñkpọ afọn se CAF enyịmme ebo ke ado se nduba aba do. Kọfnọ Udom Emmanuel Sọsọñọ-oo
